Sarangani Province—Laing walo (8) kabuok mga kanhing myembro sa New People’s Army ang nakadawat og mga benipisyo sa gobyerno kagahapong adlawa, adlaw nga Hwebes, atol sa joint meeting sa PPOC og PADAC kon Provincial Peace and Order Council-Provincial Anti-Drug Abuse Council sa Sarangani Province.
Gipangunahan nila Governor Steve Chiongbian Solon, DILG 12 Regional Director Josephine Leysa, 1002nd Brigade Commander Col. Adonis Bajao, PNP Provincial Director Col. Arpha Abul Kyr Macalangcom, og Board Member Tatang Paras sa kahugpungan sa mga barangay kapitan, ang pagtunol sa mga tseke, sa pagsuporta nila Senador Manny og Congressman Ruel Pacquiao, Sangguniang Panlalawigan og mga mayores. Kadaghanan kanila taga-Malapatan, usa niini ang gikan sa Malungon.
Human sa ebalwasyon, kwalipikado silang nakadawat og ayudang pinansyal gikan Baynte-singko Mil ka pesos (P25K) paingon na Saysentay-singko Mil ka pesos (P65K) isip firearm remuneration bugti sa mga armas nga ilang gi-surender og sa livelihood assistance.
Kini ang pasiuna pa lang sa mga benipisyo nga ilang madawat isip kabahin sa dinagkong benipisyo nga gitanyag sa E-CLIP kon Enhanced Comprehensive Local Integration Program sa Duterte Administration, sama sa pabahay og daghan pa. Malipayon usab nga gibalita kagahapon sa DILG nga sa tibuok Rehiyon Dose, unang nakatapos sa pagpabarog sa Halfway House ang Sarangani Province nahimutang sa Alabel.
Ang North Cotabato ang anaa sa 52 percent completion, 30 percent sa South Cotabato, 84 percent sa Sultan Kudarat, og 98 percent completed na sa Sarangani. Mao kini ang temporaryong kapuy-an sa mga kanhing rebelde samtang gi-proseso ang ilang paghibalik sa komunidad.
