Davao del Sur – Personal nga bangi ang gilantaw nga motibo sa insidenteng pagpusil sa usa ka lalaki alas-9:15 kagahapon sa buntag (Agosto 13, 2020) sa Sitio Patulangon, Brgy. Zone 1, Sta. Cruz, Davao del Sur.
Sa interbyu sa DXDC RMN Davao kang Police Major Crisaldo Gaila, Acting Chief of Police (COP) sa Sta. Cruz Municipal Police Station, giila ang biktima nga si Ramil Cerdan, 44 anyos, samtang ang suspek nailang si Rodrigo Sodaria, alias “Jun-Jun”, puros residente sa maong lugar.
Sa imbestigasyon, gi-agian sa suspek ang asawa sa biktima nga nanglaba ug daw nagbahad sa iyang bana dayon mi-diretso sa ilang balay ug didto na nagkalalis tungod sa ilang kanhi bangi kaniadto.
“Gi-agian (sa suspek) ang asawa (sa biktima) nga nanglaba, giingnan ang asawa nga ‘Ingna na’ng imong bana ha!’ Mao ra nay word niya. Then nakit-an siguro niya ang iyang bana sa ilang balay, gi-diretso-an ug didto sila naglalis,” saysay ni Gaila.
Miresulta ang ilang pagnaglalis sa pagpusil sa suspek ngadto sa biktima sa kaduhang higayon sa wala masayring klase sa armas ug dali kining miikyas.
Daling gidala sa Southern Philippines Medical Center (SPMC) ang biktima samtang padayon ang gihimong hot pursuit operation batok sa suspek sa krimen.
RadyoMaN Kirby Manzon
