iFM Laoag – Natalgeden ti kondision iti biktima ti pannakakuriente iti covered pathwalk iti Northwestern University iti siudad ti Laoag idi malem ti sabado Enero 18, 2020.
Nabigbig ti biktima a ni Mr. Alwin Llanera y Martinez, agtawen ti tallupulo ket uppat, awanan ti asawa, maysa a fabricator ken residente ti Dama de Noche St., Villa Adelina Subdivision, Brgy. Polo, Cabuyao, Laguna.
Segun kenni Mr. Mr. Karl Lenin Benigno, Chairman ti Disaster Response Team iti Northwestern University, awan ti pammalubos dagiti guardia iti unibersidad a mapan ti biktima iti tuktok ti covered pathwalk nu sadinno iti pannakasagidna ti livewire a nakakonektar iti poste ti Ilocos Norte Electric Cooperative (INEC) ket isu ti nangitunda iti pannakurientena.
Insigida a nakapagresponde dagiti rescue team ken naisigud a naitaray ti biktima iti Mariano Marcos Memorial Hospital and Medical Center (MMMHMC) iti siudad ti Batac.
Maipalagip a ti biktima ket maysa kadagiti kinontrara iti unibersidad nga aginstolar kadagiti markers a naaramid manipod iti marbles iti Ben A. Nicolas Building. (Joe Anne Agustin, RMN News)
