EB MAGALONA, NEGROS OCCIDENTAL – Nag-landing sa ospital ang isa ka lalaki nga nagpalagyo matapos ginpadakup sa pulis sang iya mismo pamilya bangud kay naga ma-oy kagab-i sa banwa sang EB Magalona.
Ginkilala ang biktima nga si Ronilo Pagadura, 37 anyos, residente sang Brgy. Alicante, EB Magalona.
Ang insidente natabo may mga las 8:30 kagab-i sa Barangay 3 sang amo nga banwa kon diin bangud sang tuman nga kahulugbon nag-maoy ang biktima kag ginasakit na niya sini ang iya asawa.
Bangud sini, nagdesisyon ang pamilya nga ipadakup na lamang si Ronilo apang samtang nga nagasakay na sa tricycle, hinali na lamang ini nga naglumpat.
Pilas sa iya ulo, kamot kag tiil ang naangkon sang biktima gani padayon ini karon nga ginabulong sa Corazon Locsin Montelibano Memorial Regional Hospital./dyHB BACOLOD
