Davao City – Patay ang usa ka kanhi nga drug surrenderee human misukol sa otoridad atol sa gilusad nga “Oplan Bulabog” sa Purok 4, Durian Avenue, Barangay Madaum, Tagum City alas 4:10 kaganinang kadlawun.
Sa report gikan sa Police Regional Office kun PRO XI, naila ang biktima nga si Roland Caundonan, 41 anyos, trabahante sa Hijo Resources Corporation ug residente sa nasangpit nga Brgy. sa Tagum.
Nakuhaan kini og improvised tooter ug usa ka lighter sa iyang bulsa atol sa follow-up investigation.
Base sa imbestigasyon nga sa dihang naglusad ang Tagum PNP og chokepoint sa nasangpit nga area, miagi kining si Caundonan apan wala misumiter sa iyang sarili alang sa beripikasyon nga himuon unta sa otoridad imbes nga muhunong, misutoy kini og padagan sakay sa iyang Kawasaki nga motorsiklo ug namusil matud pa ngadto sa mga pulis hinungdan nga midepensa ang otoridad ug napusilan kini igo sa nagkadaiyang parte sa kalawasan.
Gidala pa sa Davao Regional Medical Center si Caundonan apan gideklara na kining dead on arrival.
Narekober sa SOCO team ang usa ka unit sa 9mm caliber sa pistol, bolo, usa ka sachet sa gituohang shabu residue ug usa ka dako nga heat healed rectangular size sachaet nga gituohan usab nga adunay shabu.
Nasuta nga usa ka drug surrenderee ang maong lalaki apan wala na nagpakita pa aron mupailawom sa Tagumenyos Against Drugs (TADS) sa dakbayan sa Tagum.
RadyoMaN Renz Barbarona
