Padayon karong nagpaayo sa J.R Borja hospital ang usa ka 50 anyos nga lalaki nga taga-Brgy. Indahag ning syudad. Kini human gitigbas sa usa ka 48 anyos nga babaye.
Mao kini ang gipahayag ni Police Capt. Ernesto Sanchez ang hepe sa Police Station 2 Cogon.
Matud pa ni Sanchez nga gi-akusahan sa babaye ang lalaki nga nag-masturbate kon nagbinastos sa iyang atubangan mismo. Apan gipahayag sa lalaki nga dili kini tinuod sanglit ang maong babaye maoy namato sa ilang balay.
Basi sa imbestigasyon nga gihimo nilang Police Capt. Sanchez, nasayran nga dunay deperensya sa pangisip ang maong babaye.
Gikabutyag nga gibadlong lamang sa 50 anyos nga lalaki ang babaye nga dili mamato apan kalit kining gitigbas sa ulo.
Tungod niini, gikustodiya na karon Police Station 2 Cogon ang suspek nga babaye.
Samtang nagpadayon pa gihapon ang ilang gihimong imbestigasyon aron masuta kung unsa ka tinuod ang alegasyon sa duha ka panig.
