General Santos City—Padayon pa ang gihimong imbistigasyon sa Police Station 3 kalabutan sa pagpamusil patay sa wala pa mailhing suspek ngadto sa biktimang si Alimudin Karim, legal age, residenti sa Purok Malagat, FVR Vill., Barangay Fatima, Gensan alas 10:00 ang takna sa buntag.
Nasayran nga gikan sa Hall Of Justice ang biktima sakay sa tricycle uban sa iyang pag-umangkon, apan pag abot sa may Catalina Street, kini gipusil sa duha ka mga suspek nga sakay sa motorsiklo nga walay plaka numero.
Nakaangkon ug samad ang biktima sa iyang likod ug sa iyang ulo nga bahin nga hinungdan sa iyang kamatayon. Samtang blangko pa ang kabanay sa biktimang si Alimudin Karim kung si kinsa gyud ang suspek sa pagpusil patay sa biktima.
Sumala ni Amir Sulayman, pag-umangkon sa biktima nga paspas ra kaayo nag insidenti. Kalit lang matud pa nga gipusil sa duha ka suspek nga nakamotorsiklo ang iyang uyuan nga hinungdan sa iyang kamatayon.
Ang mga suspek matud pa samang nakataptap ug nawong mao nga wala nila kini namay-ungan.
