ILOILO – Padayon nga ginabulong sa Western Visayas Medical Center (WVMC) ang biktima sang pagpangluthang sa Brgy. Patlad, Dumangas, Iloilo, alas 11:55 sang gab-i, Hulyo 19.
Ang biktima ginkilala kay Honorato Gitano, 38 anyos, soltero kag residente sang Brgy. Patlad, Dumangas, Iloilo.
Ginluthang sang barangay tanod si Gitano matapos magpasilong bangod mamunog ang ulan.
Ginkilala naman ang suspek kay Robert Loquite, 52 anyos, residente sang nasambit nga lugar kag isa ka Barangay Tanod.
Suno kay PC/Insp Rene Obregon ,hepe sang Dumangas PNP, nagpasilong ang biktima sa lugar kon sa diin naga-inom ang suspek.
Ginapatihan lunsay yara sa impluwensya sang makahulubog nga ilimnon ang duha gani bangud diri, nagsinitaanay kag nagbina-isay tubtob ginluthang ni Loquite si Gitano kag naigo sa iya wala nga bahin sang likod.
Padayon nga ginabulong ang biktima sa Western Visayas Medical Center samtang ang suspek ara na sa paghinakop sang Dumangas PNP.
Tags: Visayas, Iloilo, RMN, RMN Iloilo, Kasamang Magie
