LA CARLOTA CITY, NEGROS OCCIDENTAL – Napilasan ang isa ka lalaki matapos ini ang nabungguan sang Ceres bus kahapon sa Brgy. La Granja, ciudad sang La Carlota.
Nakilala ang biktima nga si Roberto Montalbo, 58 anyos, residente sang amo man nga lugar.
Ginkilala naman ang driver sang Ceres nga may rota Canlaon-Bacolod nga amo si Ian Occena, 50 anyos.
Suno sa pagpangusisa sang La Carlota City Police Station may isa ka double tire nga nagdulog malapit sa paga-tabukan kuntani sang biktima agud kuntani magkuha sang pasahero.
Bangud sini, naalang-alang ang naga sunod nga bus bangud hinali nagtabok ang biktima nga yara naman sa impluwensya sang makahulubog nga ilimnon.
Nagtinguha pa ang driver sang bus nga maglikaw apang iya gid nalab-ot ang biktima nga padayon karon ginabulong sa Corazon Locsin Montelibano Memorial Regional Hospital./dyHB BACOLOD
