BACOLOD CITY – Isa ka dalaga nga naga-obra sa bakeshop ang nagpadulong sa Police Station 4 agud i-reklamo ang isa ka lalaki nga kaupod man lang niya sa trabaho nga nagpang-bastos sa iya.
Ang tag-reklamo isa ka 28 anyos nga dalaga, residente sang isa ka barangay sa Bacolod kag trabahante sang isa ka bakeshop sa Brgy. Villamonte.
Suno sa dalaga nga may mga las 8:30 kahapon sang aga sa mess hall sang bakeshop nga ila gina-obrahan nagpalapit sa iya ang iya co-worker nga lalaki.
Nakibot siya siling sang biktima sang hinali na nagkadto sa iya likod ang lalaki kag ginbag-id bag-id ang iya “private parts” sa buli sang amo nga babayi.
Ginsiling sang babayi nga nahuy-an gid siya ilabi na gid kay nagkadlaw man ang iban pa gid nila nga kaupod sa trabaho sa ginhimo sang suspek.
Bangud sini, nagpadulong sa Police Station 4 ang babayi kag ginpablotter ang iya kaupod sa trabaho./ Pixabay photo
