Pagadian City – Usa ang patay ug laing usa ang napagan sa nahitabong pagpamusil didto sa basketball Court taga-Purok Venus, Brgy. Maloloy-on, Molave, Zamboanga del Sur alas 5:30 kagahapon sa hapon.
Giila ang biktima nga si NOLAN GORDOBE LABESTO, 41 -anyos, residente sa nahisgutang lugar nga nagbataon og daghanang samad pinusilan sa lawas nadala pa unta sa Salug Valley Medical Center alang sa dinalian nga medikasyon apan gideklara nga dead on arrival.
Sa inisyal nga imbestigasyon nasayran nga samtang nagdula og basketball ang biktima kalit nga niabot angduha ka mga suspek nga sakay sa motorsiklo ug walay langan nga gipusil ang biktima.
Laing biktima ang napagan nga si JOHN JULARD JACALAN YU nga nagtindog lamang 25 metros sa dapit nahitaboan diin naigo sa saag nga bala.
Human sa pagpamusil daling nisibaat ang mga suspek paingon sa Barangay Culo, Molave.
Nakuha sa dapit nahitaboan ang lima ka basiyo sa bala sa calibre 45 pistola. Blangko pa ang kapulisan sa lungsod sa Molave sa motibo sa maong pagpamusil.
