Pagadian City – Gihuptan na sa kapulisan ang kopya sa CCTV camera nga gikan sa kadumalahan sa Zamboanga Lodging House nga nahimutang sa Jamisola Street., nga sakop sa Brgy. Santiago ning syudad.
Mahinumduman nga patay nang nadiskobrehan sa usa ka roomboy ang 54 anyos nga tricycle driver sa sulod sa kwarto sa maong lodging house.
Giila sa mga kapulisan ang biktima sa pangalang Jerry Lanzado, ug molupyo sa Nazareth, Buenavista ning syudad.
Sa inisyal nga taho sa mga kapulisan ang naasoy nga biktima mi-check-in sa usa ka kwarto kaganinang alas otso sa buntag kauban sa wala maila nga babaye, apan sa pagka alas nuybe daling migawas ang babaye nga kauban sa biktima.
Sa pagsubay na sa usa ka roomboy ug gituktok kini ang maong kwarto wala nitingog ang anaa sa sulod ug nakahukom nalang sila nga ablihan ang maong kwarto, ug didto nakita nga nitikig na ang tricycle driver, ug nanawag dayon kini sa mga kapulisan.
Sa ulahing imbestigasyon sa kapulisan, base sa resulta sa gilusad nga post morterm examination sa patay nga lawas walay nakitang foul play o bisan unsay kadudahan nga gihungdan sa kamatayon sa biktima.
Dakong posibilidad nga gi-ataki ang biktima dihang nagkigtagay sa lawasnon nga kalipay kauban ang wala mailing binuhat.
