Patay nang nakit-an sa iyang igsoon ang usa ka lalaki human nahulog sa lawom nga bangag ug natabunan sa iyang gikalot nga yuta para unta butangan sa poso sa tubig.
Sa interview sa dxCC-RMN, gibutyag ni PO1 Aljon Linaban sa Tagoloan Municipal Police Station nga ang biktima mao si Amaurias Bravo Jr., 42 anyos, minyo ug taga Zone 10, Sta. Cruz, Tagoloan, Misamis Oriental.
Matud ni PO1 Linaban nga mga alas otso na sa buntag nadiskubrehan sa igsoon nga nahulog sa bangag ang biktima nga dunay kalawmon nga 12 ka tiil ug natabunan sa yuta.
Gituohan nga mga alas siete pa sa buntag nahulog ang biktima ug usa ka oras na ang milabay ayha nasayran ang insedente.
Gidala pa sa ospital sa mga personahe sa Tagoloan Municipal Disaster Risk Reduction and Management Council ang biktima apan gideklarang patay nang niabot sa ospital mga alas 10:05 kagahapon sa buntag.
