Dead on arrival ang isa ka lalaki makaligad nga ginbuno sang wala nakilal-an nga suspek alas dyes sang nagligad nga gab-i sa Osita Block 2, Brgy. Zone 2, syudad sang Koronadal
Nagapaligo na sang sarili nya nga dugo ang biktima nga ginkilala kay Weenard John Balinguay Ancheta, 23anyos, soltero, KCC Mall employee kag residente sang Purok Camia, Brgy. Poblacion, Banwa sang President Quirino, Sultan Kudarat sang maspwan sa higad sang dalan sa nasambit nga lugar.
Suno sa pagpangusisa sang Koronadal City PNP, naglisinsya suno pa ang biktima sa iya ka boardmate sa Raborar compound nga nahamtang sa Abrenica St., Brgy GPS syudad sang Koronadal alas 9:20 sang nagligad nga gab-i nga maglakat sa iya abyan sa Antipolo St., Brgy Zone sa nasambit nga syudad.
Samtang nagapanglakaton suno pa ang biktima sa dalanon sang Osita Block 2, Brgy. Zone 2, isa suno pa ka lalaki ang nagpalapit sa iya kag naghulam sang lighter, nagsabat suno pa ang biktima nga wala ini sang dala, pero hinali lang nga naghunos sang kutsilyo ang suspek kag ginbuno ang biktima sa dughan.
Gilayon nga nagpalagyo ang suspek sa wala nahibaluan nga padulungan matapos matumba ang biktima.
Bangud sa insidente, gindala pa ang biktima sa ospital, apang ginbawian na ini sang kabuhi suno sa doctor nga nag-atipan.
Samtang ang pagkabutang sang biktima, kasubong sang kwarta, relo kag iban nga dokumento ginpaidalom sa kustodiya sang Koronadal City PNP kag igahatag suno pa sa iya nga himata.
Ginpaidalom naman sa laboratory examination sa PNP Cybercrime office sa syudad sang Heneral Santos ang celpon sang biktima.
Tubtub karon padayon pa ang ginahimo nga imbestigasyon sang Koronadal City PNP
