Pilason ang isa ka lalaki matapos ginlabu sang iya man lamang abyan sa barangay Maravilla, Jordan, Guimaras.
Ginkilala ang biktima nga si Julius Apilo, 32 anyos samtang ang suspek amo naman ang abyan sini nga si Lexter Sumugat, 31 anyos, lunsay pumuluyo sang amo man nga lugar.
Suno kay barangay kagawad Marilou Ronzales nga nagsaka sa puno sang kahoy ang biktima nga si Apilo kag may gintapas nga sanga apang nahulog ang ginauyatan sini nga binangon.
Subong man, natabuan nga naglabay ang suspek nga nakainum kabangdanan nga ginpinsar sini nga gintuyo sang biktima nga hulugan siya sang binangon.
Bangud sini, ginkuha ni Sumugat ang binangon kag ginlabu ang biktima nga nakaagum sang pilas sa tiyan kag sa idalum sang dughan kag gilayon nga gindala sa ospital.
Samtang nadakpan naman ang suspek kag napriso na sa Jordan Police Station.
