Pagadian City, Zamboanga del Sur- Luspad nang naabtan sa pipila ka mga residente sa Purok Bagong Silang, Brgy. Balangasan ning syudad sa Pagadian ang usa ka lalaki nga gipusil sa wala mailing suspek alas tres karung hapon.
Daling mitaho sa buhatan sa kapulisan si Jerson Lopez human iyang nakit-ang nahigda sa tunga sa kalsada ang wala maila nga lalaki nga dunay samad pinusilan sa iyang tangkugo ug papangig.
Naabtan usab sa RMN Newsteam ang biktima nga naligo na sa iyang kaugalingon nga dugo.
Paspas usab nga miresponde ang kapulisan og daling gidala sa ospital ang biktima arun katambalan.
Sa interview sa RMN sa mga lumulupyo sa lugar kalit silang nakadunggog og upat ka buto sa armas rason nga ilang gisubay ang lugar og didto nakit-an ang biktima nga nagkulob na sa kalsada.
Hangtud ning pagsulat sa balita wala pa nailhi ang biktima nga gibana-banang nagpangerdaron sa 45 ngadto sa 50 anyos ug dunay patik sa likod nga dagway ni Ginoong Hesu-Kristo.
Nanawagan ang kapulisan ning syudad sa bisan kinsa nga indibidwal nga nawad-an og kauban sa panimalay nga makigkutay kanila.
Tags; RMN Pagadian 603, Mel Coronel, Kenneth Bustamante
