LALAKING GIPUSIL PATAY SA BARANGAY LAGAO, KUMPERMADONG ASSET SA KAPULISAN

33

General Santos City–Gikumpirma ni Police Major Ruelito Lumiguid, Hepe sa Police Station 3 nga asset sa kapulisan ang biktimang si Emmanuel Dalos, hingkod ang pangidaron nga residente sa Barangay Bula ning dakbayan.


Saysay niya nga alas 7:00 pasado ang takna sa gabii dihang gipusil ang biktima sa San Pedro St. Brgy. Lagao ning dakbayan ug gituuhang gisundan ang biktima sa mga suspek nga sakay sa usa ka motorsiklo.

Narekober sa crime scene ang ubay-ubay nga basyo sa kalibre 45 nga armas.

Dugang pamahayag ni Major Lumiguid nga nagatabang kanila ang biktima higayon nga adunay mga operasyon batok illegal nga droga.

Kini matud pa maoy nagahatag kanila ug impormasyon kabahin na sa mga target, gani ayha kini gipusil-patay, adunay duha ka operasyon ang gihimo kung asa nadakpan ang mga suspek.

Sa karon ilahang ginatan-aw nga motibo ang posibleng personal grudge apan mas ginatutukan nila ang trabaho niini isip impormante sa kapulisan nga hinungdan sa pagpatay sa biktima.(LVR)

Facebook Comments