Naila na ang lalaki nga gipusil patay sa Barangay Hermano, Balingasag, Misamis Oriental niadtong Miyerkules.
Matud ni Police Master Sergeant Eric Quino sa Balingasag Municipal Police Station, naila ang biktima nga si Renante Pepito Suria, 41 anyos, minyo taga Bonifacio, Misamis Occidental apan temporaryo nga nagpuyo sa Barangay Agusan ning syudad ug usa ka mekaniko.
Dugang pa ni Quino nga giila mismo ang biktima pinaagi sa pamilya, asawa ug mga igsoon niini.
Nasayran nga dugay na nanarbaho dinhi sa syudad ang biktima ug talagsa ra kini gauli sa Misamis Occidental.
Samtang ang asawa na mismo ang nagbutyag sa kapolisan nga nalambigit na kaniadto sa kasong paglapas sa Republi Act 9165 o Comprehensive Dangerous Drugs Act of 2002 ang biktima.
Matud ni Police Master Sergeant Quino nga nakagawas ang biktima niadtong miaging tuig tungod kay naka avail sa Plea Bargaining Agreement.
Dugang pa ni Quino nga sa ilang imbestigasyon, didto ra gipatay sa crime scene ang biktima tungod sa mga nakita nila nga basiyo sa bala sa area.
Sa karon padayon pa ang gihimong imbestigasyon sa kapolisan kalabot na sa kamatayon sa biktima.
