General Santos City—Gibutyag ni Senior Fire Inspector Julio Begabo ang labaw sa Bureau of Fire Protection sa Polomolok nga ilaha ng gikasuhan og arson si Ernesto Balabat Jr. nga maoy responsable sa pagsunog sa ilang panimalay og naapil usab sa pagkasunog ang duha pa ka panimalay sa lugar.
Sumala pa ni Begabo nga gipasakaan og kaso ang nasampit sa mga biktima sa rason nga aron mahatagan og disiplina sa iyang nahimo nga miresulta sa pagkaugdaw sa tulo ka panimalay.
Samtang asoy usab sa opisyal nga moabot sa 1.1 milyon ka pesos ang nahimong damyos sa sunog sa tulo ka panimalay og wala usab may natala nga nasamdan sa maong panghitabo.
Kung kahinumduman nga una ng gisunog ni Ernesto Balabat Jr. ang ilang panimalay niadtong milabatng adlaw sa Purok Olana Brgy. Magsaysay, Polomolok, South Cotabato, alas 4:30 sa hapon kung asa naapil usab sa pagkasunog ang panimalay nilang Renato Balabat og Lore Laintoy.
Sa kasamtangan nagtingkagol sa selda sa Polomolok PNP ang nasampit nga suspek.(Raynald Timario)
