Nadakpan sa mga kapulisan sa lungsod sa Don Carlos, Bukidnon ang usa ka lalaking misuway pagsulod ug pagpangawat sa buhatan sa Community Environment and Natural Resources Office (CENRO) pasado alas 11:20 sa gabie adtong Domingo, Pebrero 4, 2024 nga nahimutang sa Barangay Poblacion Sur.
Ang maong nadakpan usa ka 19-anyos nga lalaki kinsa matud pa sa Security Guard nga sa dihang nag roving kini palibot sa compound, nabantayan niini ang maong lalaki nga mikatkat sa main gate ug mikamang kilid sa maong opisina.
Dinhi na gisikop sa Security Guard ang maong lalaki ug dayong panawag sa kapulisan.
Dugang impormasyon, nasayran nga ikaduhang higayon na kini nga pagpangawat sa suspek diin duha ka cellphone sa mga empleyado sa buhatan ang nadagit niini adtong Enero 30, ning tuiga.
Gibalhog na karon sa presinto sa kapulisan ang maong lalaki samtang ginaandam ang kasong pagpangawat batok kaniya.
Facebook Comments
