Wala maka-ipsot sa kamot sa mga otoridad ang usa ka lalaking nagbaton sa armas ug rifle grenade.
Matud ni Senior Inspector Arlyne Ranario, Spokesperson sa Misamis Oriental Provincial Police office sa Misamis Oriental nga ang suspek mao si Lino Tabamo, 51 anyos, walay trabaho ug taga Purok 4, Barangay Plaridel, Claveria Misamis Oriental.
Matud ni Ranario nga mga alas 5:30 sa buntag niadtong Martes, gironda sa Joint element sa CIDG Misamis Oriental, Regional Mobile Force ug sa Claveria Police station ang balay ni Tabamo sa Purok 4, Barangay Plaridel sa maong lungsod.
Ang maong pagpangronda pinasikad sa search warrant nga gi-issue ni Judge Richard Mordeno sa Regional Trial Court Branch 22 dinhi sa Cagayan de Oro tungod sa pagsupak sa Republic Act 10591 ang iyang pagbaton sa armas ug Explosive.
Nakuha sa CIDG gikan kang Tabamo ang usa ka improvise 12 gauge shotgun, usa ka casing rifle grenade, usa ka camouflaged sling bag ug usa ka set sa Camouflaged Uniform sa militar.
Ang maong suspek ug ang na-imbargong mga ebedensiya gidala sa buhatan sa CIDG ug ang maong suspek gipasakaan sa kasong illegal possession of fire arms and explosive.
Alayon niini, gidayeg ni Misamis Oriental Provincial Police Director Senior Supt. Rolando Destura ang mga elemento sa CIDG, Regional Mobile force ug Claveria Police tungod sa ilang malampusong kampanya batok sa gitawag nga loose fire arms sa iyang pag-ingon nga Job well done.
