General Santos City–Pabilin pang nagpaalim sa Dr. Jorge Royeca Hospital ang biktimang si Jorgen Hermoros, 35, nga taga Purok Alquisar, Barangay Apopong, Gensan kansa gidunggab sa wala pa nganling suspetsado sa may Barangay Calumpang duol sa Gensan Sports Complex alas 12:00 sa tungang gabie kagahapong adlawa.
Sumala sa igsuon sa biktima nga si Bimboy, gikan muduaw sa namatay nga kaila niini ang iyang magulang ug pauli na unta sa ilang panimalay dihang kini giatngan sa suspek ug gidunggab.
Nakaangkon ug samad sa iyang dughan ang biktima kansa dali nga gidala sa ospital, samtang ang suspek paspas nga nakasibat sa wala sayring lugar.
Dugang pagbutyag ni Bimboy nga ang suspek nga midunggab sa iyang magulang ilado matud pang bugoy sa Barangay Calumpang.
Kini subay na usab sa pahayag sa mga nakakita sa maong krimen.
Gani pila na ka higayon matud pa nga adunay gidunggab ang suspek didto sa maong lugar.
