General Santos City–Nagpadayon ang gihimong imbestigasyon sa Polomolok PNP kalabutan sa nakit-ang patay’ng lawas sa usa ka lalaki nga wala pa gayud nailhan sa Purok 1, Barangay Polo, Polomolok, South Cotabato, aron sayron ang ilhanan sa biktima ingon man ang motibo sa brutal nga pagpatay.
Kahibaloan nga una nang midangop sa Barangay Cannery Compact ang kapitan sa Barangay Polo nga si Ariston Leoberas Jr. human nga nakadawat ug impormasyon gikan sa nagpakabanang residente nga dunay patay’ng lawas sa usa ka lalaki nga nakaplagan sa lugar gilayon man usab gerespondehan sa mga personahe sa Polomolok PNP aron magpahigayon ug imbestigasyon.
Nasayran nga basi sa imbestigasyon sa kapulisan nasuta nga alas 8:00 sa buntag niadtong milabay’ng adlaw nakit-an sa usa ka trabahante sa poultry nga si Mechedo Sarmiento, nanimuyo sa Brgy. Landan Polomolok ang patay’ng lawas sa lalaki.
Saysay pa sa nasampit nga niadtong higayona gilantaw niini ang linya sa ilahang tubo nga agianan sa tubig ug iyang namatikdan nga dunay usa ka iro nga nagkalot sa yuta duol lamang sa lugar apan sa iyang paglantaw nakurat na lamang ang poultry boy nga ulo sa biktima ang iyang nakit-an nga gilubong sa lugar.
Dugang imbestigasyon sa SOCO team nahibaw-an nga ang biktima dunay daghang samad dinunggaban sa likod nga bahin sa iyang lawas nga maoy hinungdan sa iyang kamatayon ug anaa na kini sa state of decomposition.
Gibana-banaang anaa sa 40 hangtod na sa 45 ang pangidaron niini nga dunay guardians nga tattoo sa tuong bahin sa iyang kamot.
Sa kasamtangan ang patay’ng lawas sa biktima ang anaa na sa lokal nga punerarya sa Polomolok.(Reynald Timario)
