Davao City- Patay ang usa ka lalaki human mibangga ang iyang gisakyan nga Fuso Aluminum Wing Van sa usa ka dump truck atol sa vehicular accident alas 3 sa kadlawun sa km 17 Ilang Tibungco syudad sa Davao.
Subay sa report gikan sa Davao City Police Office (DCPO) naila ang lalaking namatay nga si Joshua Hachuela, 18 anyos ug residente sa Brgy Lancheta, Tacurong, Sultan Kudarat.
Sa imbestigasyon nga gilusad ni Police Officer 2 Ronil Layson, Bunawan PNP investigator nga niparking kining Fuso dump truck nga gimaneho ni Jojie Navallo, 49 anyos, taga Brgy. Cabili, Panabo City paatubang sa south area gumikan kay nadautan kini samtang ang Fuso wing van nga naglawig niadtong panahona, kusog matud pa ang padagan ug wala mabantayi sa driver nga giilang si Ruel Ambrocio, 45 anyos, nagpuyo sa Tacurong city Sultan Kudarat ang warning device nga anaa sa 8 metros ang gilay-on.
Dugang niini, buot pa unta likayan sa naghaguros nga wing van ang truck apan wala na kini ma-control sa driver hinungdan nga mibangga ang atubangan sa sakyanan ngadto sa likod sa naasoy nga dump truck resulta sa pagkadamyos sa duha ka sakyanan.
Gitabang pa sa 911 ang pasahero nga si Hachuela apan patay na kini sa dihang gi-check sa mga responders.
Nakaangkon og minor injury ang driver nga si Ambrosio samtang ang driver nga si Novallo balhug na sa Bunawan PNP ug mag atubang og kasong Reckless Imprudence Resulting in Homicide and Damage to Property.
RadyoMaN Don Pulayao
