Kabsan sa kinabuhi si Michael Utbo, 20 anyos nga taga Brgy. Bayabas, Toril ning syudad human kini nahagbong sa gisak-ang kahoy aron mamuhag og putyukan ug manguha og dugos sa Barangay Kilate, Toril, Davao City niadtong Lunes, April 15, 2024.
Sa interview sa DXDC RMN Davao kang Dexter Acala, ang bayaw sa biktima, iyang gisaysay nga sa dihang pagsaka na si Utbo sa kahoy, naputol kini ug disgrasya gyud nga siya nahulog. Apan giklarong sukwahi sa uban post sa social media, dili 200ft. ang gitas-on sa maong kahoy.
Naabtan pa og pipila ka oras usa nadala sa balay tambalanan si Utbo gumikan sa kalayo sa area nga nahitabuan apan, wala na gyud kini nakaluwas pa.
“Pagsaka na niya, naputol ang bagon pero dili man kaayo siya habog. Pagkaputol sa bagon, natagak gyud siya, diretso gyud siya sa bato nga iyang gitagakan. Buhi man siya pagkatagak pero dili na siya kastorya. Naabot nami sa SPMC alas 3, buhi pa gyud siya, gitabang pa gani siya sa SPMC. Pero nakabsan gyud siya’g kinabuhi didtoa,” butyag pa ni Acala.
Sa pagkakaron, nanawagan og tabang pinansyal ang pamilya sa biktima tungod sa kapait sa kahimtang ilabi na nga aduna kini nabiyaang asawa ug 2 anyos nga anak.
RadyoMaN Ivy Parido
