General Santos City–Gipasakaan na ug kaso sa kapulisan sa kalapasan sa Sec.5 Art. II sa RA 9165 ang suspetsadong si Lito Aguilar,49 anyos, laborer, residente sa Prk. 25, Nursery, Brgy. Lagao ning dakbayan kansa una nang nasikop sa buy-bust operation sa otoridad.
Pagbutyag ni Police Major Joel Martinez hepe sa Lagao Police Station nga dugay na nilang ginamonitor ang suspek gani dili lang nalambigit sa illegal nga droga kon dili lambigit usab kini sa pagpangawat sa ilang AOR.
Pagpaklaro usab ni Martinez nga wala sa drug watch list sa PNP ang nasampit ug dili usab kini drug surrenderee gani ilaha kining gikonsidera nga newly identified nga nalambigit sa ginadiling droga.
Dugang pamahayag ni Major Martinez nga dili pa nila matumbok kung asa gakuhaan ug ginadiling droga ang suspek gumikan kay nagdumili pa kini nga isulti kung asa nga lugar nagikan ang maong marijuana.
Saysay sa opisyal nga dili pa nila ma-identify ang mga kaubanan sa suspek sa ilang illegal nga gimbuhataon tungod kay siya lamang ang naaktuhan sa kapulisan nga namaligya ug pinauga sa dahon sa marijuana.
Kahibaloan nga una nang nasikop ang nasampit human gipahigayonan ug buy bust operation sa kapulisan ug napalitan ug usa ka bundle sa pinaugang dahon sa marijuana gamit ang 500 pesos nga buy bust money.(Raynald Timario)
