General Santos City–Patay ng nakit-an sa iyang mga kaubanan sa trabaho ang usa ka landguard sulod mismo sa iyang panimalay kung asa anaa pa kini sulod sa duyan nga iyang gihigdaan dihang gibakwian kini ug kinab.
Ang biktima giila sa pangalang Roberto Pimentel, 42 anyos, ulitawo nanimuyo sa Purok Olarte Brgy. Labangal Gensan.
Segun pa ni Lucio Pardillo, kauban sa trabaho sa namatay, nga alas 7:00 sa buntag iyang gi-adtuan ang panimalay niini aron unta bisitahon ang nasangpit apan gikahikurat na lamang niini dihang iyang nakit-ang wala nay kinabuhi sulod sa duyan ang biktima.
Dugang ni Pardillo nga tulo ka adlaw wala nagduty ang maong landguard tungod aduna matud pa kini gitrabaho apan natingala ang nasangpit nga wala nakabisita sa ilang panimalay ang biktima sulod sa pipila ka adlaw mao nga iyang gibisitahan sa pinuy-anan niini.
Nagtuo ang kauban niini nga posibleng giurom ang biktima nga misangko sa iyang kamatayon tungod basi matud pa sa pamahayag sa pamilya niini kanunay matud pa kining gina-urom.
Sa karun ang kapulisan ilawom sa Police Station 2, nga maoy nag-imbestiga ang walay nakitang foul play tungod wala silay nakit-ang mga samad sa lawas o unsa mang timailhan nga gipatay ang nasangpit nga landguard.
