BACOLOD CITY – Nagresulta sang kamatayon sang isa ka lalaki kag pagkasamad sang isa pa ang natabo nga pangpangluthang sang 4 ka mga suspek kaina sang kaagahon sa Bag-ong Dalan, Purok Neptune, Brgy. Singcang-Airport, Bacolod City.
Nakilala ang biktima nga napatay nga amo si Venzo Villamo, Alyas Bugris, 26 anyos, tumandok sang Cauayan, samtang, ang nasamaran naman amo si Raffy Cardenias, 35 anyos ang edad, pumuluyo sang amo nga lugar.
Suno sa imbestigasyon sang Police Station 8 may mga la 1:30 kaina sang kaagahon, ang mga biktima ang yara sa gwa sang isa ka tiyangge kag nagahampang sang tumbo.
Ini sila ang ginpalapitan sang 4 tanan ka mga naka-mask nga suspek kag una nga gintiro si Raffy kag ginsunod si Alyas Bugris.
Si Bugris ang natam-an bangud na-igo ini sa iya ilong kag tuo nga mata, samtang si Raffy naman ang gindala sa ospital kag luwas na matapos nga kibyas manlang ang igo kamot.
Isa sa ginalantaw karon nga motibo amo ang posible transaksyon angut sa illegal nga druga bangud base sa panuaron sang pila sa mga nakakilala kay Bugris, ini siya ang involved sa illegal drugs kag sadto nakaagi na priso./dyHB BACOLOD
