Ipalusot unta padulong sa kaulohan pinaagi sa pagpadala sa Post Office ang subok sa kahoy’ng lapnisan apan walay swerti nga natimaho-an kini sa mga otoridad ug gilayong gilusad ang operasyon ug malampusong nakompiska ang maong butang.
Gipangunahan sa Criminal Investigation Detection Group (CIDG) Caraga ang operasyon kauban ang Trento Municipal Police Station ug DENR 13 Enforcement Division, gisulod sa operatiba ang Post Office sa lungsod sa Trento, Agusan del Sur ug didto nadiskobrehan ang daghang subok sa kahoy’ng lapnisan.
Mitimbang kini sa 17.2kg ug sa bana-bana sa DENR mokantidad kini sa P5,370,000.00 kung mahalin.
Sa maong operasyon pakyas ang CIDG sa pagsikop sa suspek kinsa gustong mopalusot sa lapnisan apan padayong gihimu nila ang makuting imbistigasyon sa kaso.
Gikustodiya na sa DENR ang nadiskobreng subok sa kahoy’ng lapnisan. Natigayon ang operasyon bandang alas 10:30 ang takna sa buntag kagahapon [image: agar wood.jpg]
