Good morning po sa mga paradangog kan DWNX. Good morning man sa management, faculty and staff kan ateneo de naga high school.
Ngonian na aga ipadagos ta po ang napuonan tang topic kan sarong aldaw tungkol sa legal separation, bilang simbag sa hapot kan sarong paradangog.
Nasabi ta po na dapat tang pag-olayan ang problema sa surohayan kan pamilya. Taano po?
Palangkaw ang numero kan mga suruhayan, kan mga pagpawara ning bisa sa kasal, kabali na po ang legal separation na dawa dai man nagkakansela sa kasal, ang relasyon kan mag-agom halos putol na man sana. Ang mga ini nagkakawsa ning kumplikasyon sa mga aki, dakul sa mga aki nagkakaigwa personality disorders, nagiging problema kan komunidad, kan nasyon, kan kinaban.
Sabi ta po, igwa ning mga sitwasyon na tugot ang ley, ang Family Code, maglegal separation, base sa mga grounds na nasambit ta na the other day.
Pag may maray na basehan magsuhay sa agom, ang sunod na hapot, nuarin ka puede magfile ning legal separation?
Puede ka po magfile ning petition for legal separation sa laog ning limang taon pagkatapos kan pangyayari kan mga nasabi kong grounds. Halawig po ang panahon na itinatao. Halimbawa, maski na po nagpadagos kamo pag-ibahan pagkatapos na nagporbar sa buhay mo ang agom mo, puede ka magfile hasta 5 years pa. Pero, sa sitwasyon ning pagiging sexually unfaithful kan agom mo, dai ka na puede makafile kung pinatawad mo sya pagkatapos mo maaraman o may pagtugot ka sa sexual relations nya sa iba.
Sain ka po puede magfile ning legal separation?
Sa regional trial court po, sa family court yan, kan lugar ning residencia mo kung sain at least anom na bulan kang nakaistar. Kung dai ka nakaistar sa Pilipinas, puede ka magfile sa RTC Family Court kung sain ka yaon sa Pilipinas, puede ka man magfile sa lugar kan residence kan pigrereklamong agom, depede po saimo.
Ano po ang epekto kan decree ning legal separation hali sa husgado?
(1) ang mag-agom may derecho ng magsuhay ning harong, pero ang kasal preserbado pa;
(2) puede imponeran ning obligasyon ang mga mag-agom o ang pigrereklamong agom na magtao ning support
(3) ang pigrereklamong agom disqualified na magmana sa nagreklamo apuera nalang kung pamanahan sa paagi ning will. Kung bago pa naglegal separation, igwa ng will si nagreklamong agom kung sain may mana ang pigrereklamo, pagluwas kan desisyon kan husgado, automatic na kanselado ang mana sa will dawa dai baguhon kan nagreklamo. Kung igwang pigdonar sa pigreklamong agom, ang nagrereklamo puede ipakansela ang donasyon.
(4) kung gusto man kan dawa sisay sa mag-agom, puede na ipabanga sa husgado ang conjugal o absolute community property ninda, idisstribwir na sainda; puede man magmotion ang arin man sa lado patungkol sa custody saka support kan mga aki;
Pano po kung nagkabalikan, nagkasundo giraray habang pendiente ang kaso?
Mayo man po makakapugol kayan dawa ang husgado, ang mag-agom kaipuhan lang magsubmit sa court ning affidavit of reconciliation. Kung naisubmit ini habang pending pa ang kaso, mayo pang desisyon, tolos ididismiss kan court ang kaso; kung naisubmit ang affidavit may desisyon na pero dai pa nailuwas ang decree, kaipuhan idagdag lang kang mag-agom ang desire ninda kung gusto ibalik sa dating property relations o may bagong arrangement sa properties; kung nakasumitir kan affidavit of reconciliation sa panahon na igwa ng naissue na legal separation decree, kakanselahon kan husgado ang decree pero dai na mahihira ang property relations except kung sabihon kan magagom na ibabalik ninda ang dating property arrangement o bagong arrangement; basta po ang rule, pag nagkasundo giraray, sabihon sa husgado kung ano ang mga gusto nindong arrangement, si dati na sararo ang property nindo o suruhay ang property sa ngaran kan kada saor o ano pa man na bagong orolay, para iyo man ang aprubahan. Dai lang po nindo basta bayaan ang husgado, ta may legal effects yan saindo kung magpabaya kamo. Giromdomon ta po na ang decree kan husgado pigpaparecord sa civil registrar o sa Phil Statistics Authority, kabali dyan ang epekto sa mga pagrurugaring nindo.
Sa hapot po tungkol sa fees sa legal separation, depende po sa orolay nindo kan dodolokon na abogado. Sa court naman, may mga standard fees, bako man po dakula, maghapot sa clerk of court kan RTC sa lugar kung sain kamo mafile.
Ayan po, sana nakacontribwir kita sa kaaraman kan publiko. Magtext or call lang sa numbers kan DWNX kung may mga hapot na legal.
Bago po ako magpaaram, let us all be reminded kan sugo kan Diyos sa husbands and wives, kung pano magkakaigwa ning very fruitful and happy and blessed na marriage. Sa pag-agom po baga, sa puon may expectation na kita na magiging blissful ini, pano ta po yan maaabot ang expectation na yan? Turn to the bible sa –
Ephesians 5:33 – Nevertheless let every one of you in particular so love his wife even as himself; and the wife [see] that she reverence [her] husband.
Ini po si Atty Angel Ojastro III
Aramon an saindong derecho, INI AN LEY!!!
