Ayon kay Punong Barangay Generoso T. Gomez, isang kaso na ng leptospirosis ang naitala sa kanilang lugar, ngunit nagpapagaling na umano ang naturang pasyente.
May isa pa ring evacuee na nakitaan ng mga sintomas na maaaring may kaugnayan sa sakit kaya agad itong isinugod sa ospital para mabigyan ng kinakailangang medical attention.
Bilang preventive measure, pinaigting ng barangay ang pamamahagi ng libreng doxycycline sa mga residente, alinsunod sa gabay ng health authorities, upang makatulong na maiwasan ang pagkalat ng sakit.
Katuwang din ng barangay ang mga Barangay Health Workers o BHWs sa pagmo-monitor sa mga pamilya, lalo na ang mga nasa evacuation centers at mga lugar na apektado ng baha.
Tinutulungan din nila ang pamamahagi ng gamot sa mga kabahayan at pagbibigay ng health information sa mga residente.
Samantala, pinaalalahanan ang publiko na iwasang lumusong o maglakad sa baha, lalo na kung may sugat o galos sa balat.
Pinayuhan ding agad magpakonsulta kung makaranas ng sintomas na maaaring kaugnay ng leptospirosis matapos ma-expose sa baha.
Hinihikayat naman ang mga residente na makipag-ugnayan sa BHWs at health authorities upang agad na maaksyunan ang posibleng kaso at maprotektahan ang komunidad. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣