Tinguhaan nila suno kay Polomolok Mayor Honey Lumayag Matti nga indi na maglapta pa ang coronavirus disease 2019 ukon COVID-19 sa banwa matapos nga nakarecord ang isa ka nagpositibo sa nasambit nga balatian.
May-angot sini, gilayon suno pa nga nagpasar sang resolution ang municipal Inter-Agency Task Force nga nagahingyo kay Governor Reynaldo Tamayo Jr., nga ibutang sa Modified Enhanced Community Quarantine ang bug-os nga banwa nga nag-epektibo naman kahapon nga adlaw Mayo 20 base naman sa guidelines sang national IATF.
Sa idalom sang modified ECQ ginadumilian ang mga public utility vehicles nga magbyahe sa banwa.
Ginkumpirmar man ni Mayor Matti nga padayon ang contact tracing kag ang 10 ka direct contact sang pasyenti nga negatibo sa rapid test ang ginpaidalom pa nila sa swab test para sa confirmation.
Hingyo niya naman sa mga pumuluyo nga magkooperar sa ginapatuman nga preventive measures batok COVID-19.
