Syudad sang Iloilo-Mas mahatagan sang dako nga kahigayunan ang mga Children in Conflict with the Law (CICL) sa Balay Dalayunan Home for Boys sa Bo. Obrero, Lapuz, Iloilo City nga mapasangkad pa ang ila kinaalam kag ihibalo sa mga nagakatabu sa palibot.
Kasunod ini sang pagbukas sang Library sa sulod sang Balay Dalayunan kun sa diin may 32 ka mga CICL.
Suno kay Marion Aguirre, Librarian IV sang Iloilo City Library, sa mga distrito kuntani sang syudad nila tukuron ang library apang ginpanugyan nanday Mayor Jed Patrick Mabilog kag City Administrator Atty. Hernando Galvez nga sa Dalayunan ipahamtang ang isa sa mga libraries.
Ang Balay Dalayunan amo ang center sang syudad nga ginapahamtangan sang mga kabataan nga naulamid sa krimen kag napasakaan sang reklamo.
Diri sila ginahatagan sang kahigayunan nga marehabilitate agud magbag-o ang banas nga usuyon sa ila palaabuton.
