Sarangani Province—Plastada na karong panahuna ang Sarangani Capitol Gymnasium alang sa libre nga pay-per-view sa away ni People’s Champ og Fighting Senator Manny Pacquiao batok sa Australian boxer nga si Jeff Horn. Mahitabo kini karon ng adlaw nga Dominggo, Hulyo dos (2).
Segun ni Mariter Sayson, ang provincial administrator, alas otso (8) pa lang sa buntag abri na ang Gym sulod sa Kapitolyo sa Sarangani pwede ng malantaw ang mga dula sa undercard.
Tres Mil (3k) katao ang kapasidad sa Gym apan sa pirmeng higayon gaapaw matud pa ang gidaghanon sa mga gustong mulantaw sa away sa kanhing kongresista sa probinsya og karon senador na sa Pilipinas.
Gawas sa mga sementong lingkuranan isig kilid sa Gym, pun-on pud og mga plastic nga lingkuranan ang hawanan sa Gym aron maka-plastar ang manglantaway. Gidugangan na og mga unit sa aircon aron mas mubugnaw pa ang palibot. Nakapadala na usab og sulat ang Kapitolyo ngadto sa pamunuan sa SOCOTECO naghangyo nga wala untay mahitabo nga brownout sa maong adlaw. Apan nakaandam man hinuon matud pa ang generator sa Kapitolyo.
Gidungag ni Sayson nga ang maong libreng pagpatan-aw sa dula ni Pacman ang pirme ng gina-organisa sa mga opisyales sa Sarangani sa pagpanguna ni Governor Steve Chiongbian Solon.
Sama sa nahitabo kaniadto, lauman matud pa ang paglugsong sa mga katawhan gikan pa sa mga kabukiran sa Sarangani, hilabi na sa Alabel og Malapatan, aron sud-ungon og tagaan sa ilang suporta ang ilang boxing idol, og makita ang mga nagpungasi nga mga kinumo sa duha ka boksidor direktaminti sa syudad sa Brisbane sakop sa estado sa Queensland sa nasud Australia.
Sa kabahin usab ni Retired Colonel Jaime Tabucon, ang hepe sa Provincial Security Group kon PSG, nakapahigayon na matud pa sila og security meeting. Gawas sa iyang mga ginsakpan, anaa matud pa ang mga kapulisan gikan sa Alabel Municipal Police Station og Provincial Headquarters aron muayuda sa seguridad. Lauman ang hugot nga kapkapanay. Gibawal ang pagdala og mga backpack, sling bag, mga hinagiban og armas. Gidili usab ang pagpanigarilyo sulod sa Gym. (Sarangani PIO)
