SAN CARLOS CITY, NEGROS OCCIDENTAL – Gintiro patay sang riding-in-tandem ang isa ka katapo sang NFSW sa iya mismo balay sa San Carlos City kaina las 8:30 sang aga.
Nakilala ang biktima nga si Julius Broce Barellano, legal ang edad, Chairperson sang Had. Medina Farm Workers Association, isa ka lokal nga chapter sang National Federation of Sugar Workers sa San Carlos City.
Ang biktima isa man ka katapo sang media nga naka-base sa ciudad sang San Carlos.
Suno sa imbestigasyon sang San Carlos City PNP, brutal nga gintiro ang biktima sa iya mismo balay sang wala makilala nga duha ka suspek nga naga-angkasanay sa motor.
Ang biktima nag-angkon sang walo tanan ka igo sang bala sa pila ka bahin sang iya lawas. Gindala pa ini sa San Carlos City Hospital apang wala na natabangan.
Sa press statement sang NFSW, nahibaluan nga ginpangunahan ni Julius ang lokal nga away sa Hacienda Medina matapos nga gin-angkon sang nakilala kay Wellington Uy ang duta nga ila gina-instaran kon diin gin-alegar nag-experience sang nagkalain-lain nga harassment, pagpamahog kag intimidasyon ang mga pumuluyo halin kay Uy kag sa iya mga goons.
Wala pa nakakomento si Uy sa amu nga akusasyon sang NFSW.
Kahapon lang sang nagkalipay ang mga pumuluyo matapos ginpagwa sang korte ang order of dismissal pabor sa pumuluyo sa ikatatlo na nga beses nga pagfile ni Uy sang ejectment case batuk sa pumuluyo.
Ginpahayag nga ang biktima ang makapila ka beses na nga ginpahalin sa gina obrahan sini nga local newspaper bangud ginsiling nga impluwensya sang iya pangontra sa ila lugar.
Angut sini, nagpahayag sang hugot nga pagkonder ang NFSW sa natabo nga brutal nga pagpatay sa isa nila ka miembro.
Nagapati ang NFSW nga wala sang iban nga may motibo sa pagpatay kay Julius kundi ang masupog nga pag-angkon ni Wellington Uy kag mga kaupdanan sini sang ila duta. /dyHB BACOLOD
