Gintumod ni Anti-Kidnapping Group (AKG) director PSSupt. Glen Dumlao ang duha ka Ilonggo nga amo ang lider sang sindikato nga naga-operate sa Region 4-A.
Ini kasunod sang shootout nga nagluntad sa Brgy. San Nicolas, San Pablo City, Laguna sa diin patay ang lima ka mga kidnappers nga gintumod sang AKG nga lunsay mga Ilonggo.
Sa interview sang RMN Iloilo kay Dumlao, iya ginpahayag nga residente sang Passi City ang duha ka lider sang sindikato nga sanday Ricky Barrios kag SPO2 Leo Pamonag nga assigned sa Sta. Rosa Police Station.
Suno pa kay Dumlao nga preso sa BJMP Lucena si Barrios bangud sa kaso nga illegal possession of firearms kag involve man sa murder sa Batangas.
Naga-operate sa Region 4-A ang mga ini humalin sadtong 2015 kag ginsakyan ang war on drugs sang gobyerno kag nagapakunukuno nga katapo sang PNP ukon PDEA para sa ila illegal drug distribution.
Suno kay PSSupt. Dumlao ginkidnap sang Ricky Barrios group si Ronaldo Arguelles , isa ka High Value Target (HVT) kag nagdemand sang Php700,000.00 nga ransom bangud competitor nila ini sa drug distribution sa nagkalaian-lain nga lugar sa Quezon.
Ginpahayag ni Dumlao nga antes ginkidnap si Arguelles , ginpadakop pa sini ang mga drug pushers sa idalom sang Ricky Barrios group.
Gintumod naman ni Dumlao ang lima ka mga kidnappers nga miyembro sang Ricky Barrios group nga napatay sa shootout nga amo sanday Lino Paderal sang Passi City ; Simplicio Parreño sang San Enrique, Iloilo ; Juan Lobasco sang probinsya sang Capiz ; Jabby Abanso sang Iloilo kag Marcelino Sicab sang Iloilo.
Sa karon arestado na sanday Barrios kag SPO2 Pamonag kag napasakaan na sang nagaka-igo nga kaso .
(photo from web)
