Suportado sa National Telecommunications Commission kon NTC Region 10 ang Senate Bill no. 1636 kon ‘Lifetime Cellphone Number Act’.
Una niini, aprubado na sa ikatulo ug katapusang pagbasa sa Senado ang mao nga balaudnon.
Sa interview sa RMN Malaybalay ngadto kang NTC 10 Regional Director Engr. Teodoro Buenavista, gibutyag nga ang nakanindot niini tungod kay ilawom sa balaudnon, ang mga mobile phone subscribers makabaton na lamang sa usa ka cellphone number bisan pa manghulip kini sa Service Providers, Subscription Plans, mapa-Prepaid man o Postpaid.
Matud sa regional director nga tungod niini mawala na usab unya ang interconnectivity fees nga gipatong kada mutawag o magpadala sa text message sa ubang networks.
Gidugang pa ni Director Buenavista adunay kagawasan na ang mga consumer nga mupili sa ilang gustuhong Telco nga sulod sa ilang budget nga dili magbaylo sa contact number.
Sigun pa niini nga tungod niini mahadlok na unya ang mga scammers tungod kay mamonitor na ilang mga kalihukan.
