Nagakahangawa ang mga punong barangay sa banwa sang Cabatuan Iloilo nga indi madayun ang plano nga pagpatukod nila sang bag-o nga Liga Hall subong nga tuig matapos nga wala pa sa gihapon mapasar ang 2019 General Fund sa probinsiya sang Iloilo.
Suno sa kay Cabatuan Municipal Mayor Ronilo Caspe, nagpangayu sang dugang nga pondo ang Liga ng mga Barangay sa banwa sang Cabatuan para idugang sa 2 milyunes pesos nga pondo nga ginpain para sa bag-o nga 2 storey Liga building.
Nagakahangawa naman ang mga kapitan kon sa bulan sang marso pa ma-aprubahan ang pondo bangud possible pa ini maabtan sang banning kadungan sa pag-umpisa sang election period sa Marso 29.
Ang banwa sang Cabatuan ang may yara sang 68 ka barangay rasun nga nagagutok na sila sa daan nga Liga hall kag nagdugang pa ang opisina sang Sangguniang Kabataan nga nag-okupa man sa lugar.
Nahibaluan nga ang daku nga bahin sang 2019 General Fund sang probinsiya sang Iloilo ang napain para sa pagpondo sang mga proyekto sa mga kabanwahanan sa probinsiya kag subong man sa social services para sa mga nagakinahanglan.
