Nahiagom sa grabing kadaot ang mga residente sa lima ka mga lungsod ug 29 ka mga barangay sa Lanao del Norte tungod sa grabing baha nga milampaso niadtong Martes tungod sa kusog nga ulan nga dala sa Localized Thunderstorms tungod sa Hanging Habagat kon Southwest Monsoon.
Matud sa PAG-ASA nga ang Southwest Monsoon nagdala sa baga ug itom nga dag-om kay ang maong weather system gipakusog man kini sa Bagyong Falcon nga mihapak karon didto sa Northern Luzon.
Ang maong baha maoy nagguba sa mga balay, imprastraktura ug agriculture product sa Lanao del Norte.
Lakip sa record nga nahipos sa Camp alagar, naka-angkon sa dakong damyos ang mga lungsod sa Sapad, Lala, Sultan Naga Dimaporo, Salvador ug Kapatagan.
Matud ni Police Lt. Col. Mary Hortillosa nga Spokesman sa Police Regional Office sa Northern Mindanao nga sa lungsod sa Sapad, 12 ka barangay ang gilampaso sa baha nga naglakip sa Barangay Poblacion, Barangay Mala, Salug, Maito Salug, Induran, Pili, Dansalan, Lower Sapad, Panoloon, Pandian, Maporog, ug Karun.
Samtang lima usab ka barangay ang apektado sa lungsod sa Lala nga naglakip sa barangay Darumawang Ylana, Lanipao, Maranding, Tenazas ug Pinuyak.
Sa Sultan Naga Dimaporo, duha ka barangay nga nalakip sa Poblacion ug Bauyan.
Sa lungsod sa Kapatagan, napulo ka barangay ang apektado sa maong baha nga naglakip sa barangay Poblacion, Marandig Annex, De Asis, Sto. Tomas, Conception, Bagong Silang, Balili, Lapinig, Cuvada ug Sta. Cruz.
Sa lungsod sa Salvador, lima ka barangay ang nalubog sa tubig.
Matud ni Hortillosa nga tungod sa maong baha apektado ang 2,860 families sa lungsod sa Sapad, 634 sa Lala, 511 sa Sultan Naga Dimaporo, 104 sa Kapatagan ug 159 sa lungsod sa Salvador.
Gibutyag ni Hortillosa nga ang mga flood victims, temporaryong nagpuyo karon sa 20 ka mga Evacuation Centers sa Lanao del Norte nga naglakip sa unom ka Evacuation Center sa lungsod sa Lala, 11 sa Sultan Naga Dimaporo, 2 sa Kapatagan, 1 sa Salvador.
Matud ni Hortillosa tungod sa maong baha, naguba ang 15 ka mga balay sa lungsod sa Sapad, duha sa Lala, pito sa Sultan Naga Dimaporo.
Putol usab ang usa ka foot bridge sa lungsod sa Sapad, natumba ang tulo ka poste sa kuryente sa Sultan Naga Dimaporo nga iya sa Lanao del Norte Electric Cooperative kon Laneco.
Matud ni Hortillosa nga tungod sa maong katalagman, usa ang patay ug usa ang Injured sa lungsod sa Lala.
Kini ang rason nga matud ni Hortillosa, gi-deploy ni Police Brigidier General Rafael Santiago ang Reginald director sa PNP Region 10 ang ilang mga police personnel aron motabang sa search and rescue efforts sa mga apektado sa maong baha.
