Mi-petisyon aron mosalmot sa plebisito sa Bangsamoro Organic Law ang lima ka mga barangay sa dakbayan sa Iligan.
Kini gilangkuban sa Lanipao, Kalilangan, Dulag, Panoroganan ug Mandulog.
Niadtong Martes, Disyembre 4, personal nga gitunol ni Renandang Comonog, residente sa Barangay Panoroganan, ngadto kang Atty. Joseph Hamilton Cuevas, Provincial Election Supervisor sa Lanao del Norte, ang mga dokumento nga gikinahanglan, aron makasalmot sa ipahigayong plebisito sa Enero 21, sunod tuig.
Buot sa mga residente sa maong mga barangay nga magpasakop sa Bangsamoro Autonomous Region in Muslim Mindanao nga hulip sa kasamtangang Autonomous Region in Muslim Mindanao ilawom sa Bangsamoro Organic Law o BOL.
Sa nahisgutang lima ka mga barangay, ang Mandulog lang ang wala makakuha og 10% nga pirma sa kinatibuk-ang mga rehistradong botante nga maoy gikinahanglan aron makasumiter sa ilang petisyon.
Miingon si Cuevas nga naghulat nalang sila karon nga mogawas ang resulta sa gipahigayong verification sa mga pirma sa maong mga residente.
Buot ipasabot, kung mapamatud-an sa gipahigayong verification nga lehitimo ang mga pirma sa mga residente ug ma-aprubahan kini sa Commission on Elections, makasalmot ang Iligan City sa plebisito sa Enero.
Apan, tungod kay dili man sakop sa kasamtangang ARMM ang dakbayan, nagkinahanglan usab kini og ‘double majority win’ sama sa unom ka mga lungsod sa Lanao del Norte.
Sa ‘double majority win’, kinahanglang modaug ang YES votes sa barangay nga nag petisyon ug sa tibook Iligan, tungod kay lakip mang mobotar ang mga botante sa mga barangay nga wala miapil sa petisyon.
Kung modaug ang YES sa barangay nga mipetisyon, apan pilde kini sa tibook Iligan, nagpasabot nga wala mitugot ang tibook Iligan nga magpasakop ang lima ka barangay nga masakop sa BARMM. (Divina M. Suson)
| | Virus-free. www.avast.com |
