GENERAL SANTOS CITY- Perting pagkakubit sa lima ka mga lalaki nga nailhang sila Andrey Allen Barriatos, Kevin Mondejar, Davis Calsis, Aaron Causing ug usa ka Revin Arky Mondejar.
Mismong mga sakop sa Philippine Drug Enforcement Agency 12 gipangunahan ni Regional Director Naravy Duquiatan inabagan sa Police Station 3 ug 4 sa General Santos City Police sulod sa Jessa Mae Apartment, Denoga Subdivision, Barangay Lagao alas-2 sayo sa buntag adlawn Myerkules.
Sumala ni PDEA 12 Spokesperson Kat Abad, nasikop sa usa ka buy-bust operation nga inisyal nga gipahigayon batok sa suspek nga si Kevin Mondejar, 26 anyos, residente sa Aquino Village Kaunlaran, Yumang Extension, Brgy. San Isidro.
Napalitan siya sa poseur-buyer nga PDEA agent og pakete sa gidudahang shabu balor sa 500 pesos nga marked money.
Ang maong operasyon midiskobre sa mga otoridad sa usa ka drug den ug pagkaaresto sa tag-iya nga si Andrey Allen Barriatos, 27 anyos ug estudyante.
Bisita sa maong drug den silang Davis Calsis, taga-Conel; Aaron Causing, ug Revin Arky Mondejar, parehong taga-Susana Homes, Lagao.
Sumala kay Spokesperson Abad, si Revin Arky Mondejar gikaingon nga source sa illegal drugs ni Kevin Mondejar.
Nasayran nga kanhi na kining naaresto sa PDEA RO 12 ug gipaubos sa probation human mi-avail sa plea bargain agreement.
Nakumpiska sa maong operasyon ang tulo ka gagmayng pakete ug upat ka medium sachets sa gidudahang shabu nga nagbalor og kapin 74 mil pesos, kauban pa ang mga drug paraphernalia.
Kasong pagsupak sa Article II sa RA 9165 ang atubangon sa mga suspek nga gi-paslak sa PDEA RO 12 Detention Facility.
For more info’s and updates, like and share our official facebook account : www.facebook.com/ifm91.9Gensanofficial/
[image: DRUGDEN.jpg]
