Lima pa ka mga centenarians sa rehiyon dose ang nahatagan sang Department of Social Welfare and Development 12 sang cash grants kag felicitation nga pirmado ni Presidente Rodrigo Duterte subong nga tuig .
Duha ka mga centenarians ang halin sa Polomolok kag Banga, samtang isa naman sa banwa sang Surallah.
Suno kay DSWD 12 Regional Director Cezario Joel Espejo sa subong yara na 565 ka mga katigulangan nga naglab-ot sa isa ka gatos ang nakabaton sang programa sang gobyerno sa rehiyon.
Kabug-usan nga P56.5 million ang narelease nga cash incentives sang ahensya halin sang tuig 2016 sa diin nakabaton sang P100, 000 ang kada centenarian.
Base sa ila datos suno kay Espejo nagalab-ot sa 314 ka mga centenarians ang nahatagan sang insentibo kag felicitation sang 2016; 69 sang 2017; 73 sang 2018; 50 sang 2019, kag 54 sang nagligad nga tuig base sa Republic Act No. 10868 ukon ang “Centenarians Act of 2016”.
Makabaton man ang mga kwalipikado nga centernarian sang awards kag insentibo halin sa tagsa sini ka mga local government unit (LGU).
May-angot sini, ginaawhay ni DSWD 12 Assistant Regional Director Bonifacio Selma ang mga may-yara sang himata nga naglab-ot na sa 100 ang edad nga magcoordinate sa tagsa ka LGU kag ipresentar ang birth certificate, passport, Office of the Senior Citizen Affairs ID, marriage certificate, ukon anuman nga ID nga nagapamatuod sang centenarian’s birthday.
Samtang kon wala sang birth certificate pwede man ang birth certificate sang bata sini agud maistablisar ang edad sang centenarian.
