BACOLOD CITY, NEGROS OCCIDENTAL – Pagkatapos sang linog nga nagluntad kahapon sang hapon sa probinsya sang Leyte, gilayon man nga natabo ang brown-out sa ciudad sang Bacolod kag pila ka bahin sang Negros Occidental.
Ginpahayag sang National Grid Corporation of the Philippines – NGCP nga bangud sang 6.5 magnitude nga linog sa Jaro, Leyte, naka-experience sang black-out ang Leyte, Samar, Bohol Islands, Panay, Negros kag Cebu Island.
Paathag sang NGCP nga kasunod ini sang damage sang ila mga transmission facilities sa diin maga-patigayon sila sang aireal kag foot patrol agud mahibalu-an ang kahalitan nga gintuga sang amo nga linog.
Madumduman nga nagdangat sa Intensity 4 ang linog nga nabatyagan sa Negros Occidental matapos ini nagluntad sa Leyte kahapon sang hapon.
Suno sa PHILVOCS, intensity 4 ang nabatyagan nga pagtay-og sa Sagay City, Negros Occidental, intensity 3 sa Bacolod City kag Calatrava, Negros Occidental, kag intensity 1 naman sa La Carlota City.
Samtang, ginpahayag naman ni Provincial Disaster Risk Reduction Management Division – Head Zeaphard Gerhart V. Caelian, nga halos nabatyagan sa bilog nga probinsya ang pagtay-og sa diin wala naman sang ginreport nga kahalitan sa amo nga linog.
