BAGO CITY – (2nd Update) Posibli kaso nga frustrated murder ang ipasaka sang Bago City PNP kontra kay Noel Escanar, 32 anyos sang Purok Kapayas, Barangay Malingin.
Suno kay PSInsp. Hercules Trigue, Jr. sang Bago City PNP nga ila pa ginaistorya ang pamilya ni Marievic Sustioso, 51 anyos kon bala desidido sila nga ifile ang kaso kontra sa iya kalive-in.
Madumduman nga sang Domingo sang gab-i natabo ang pagbuno ni Noel matapos nga nagapangimon ini.
Sang gab-i nga atu, nanghagad si Noel nga makighilawas kay Marievic apang wala gilayon nagpasugot ang babaye bangod basa pa ang iya buhok kag naghambal nga ‘karon lang kon magmala na’.
Bangod nagbalik naman sa pinsar sang lalaki nga posibli may iban ga lalaki ang iya kalive-in sa indi sini pagpasugot gilayon sa iya gusto, rasun nagkuha ini sang kutsilyo kag ginbuno.
Igo sa paa, kamot kag pus-on ang naagom sang babaye sa mapintas nga kamot sang lalaki.
Sang nagligad nga bulan, ginpasumon man gali sa barangay ni Noel ang lalaki nga iya duda, gina-alegar naluyagan sang iya kalive-in sa diin sa barangay sila naghusayay.
