Mihimo og lakang ang Sangguniang Panlalawigan sa Misamis Oriental aron mapanubag ang local finance committee kon nganung hangtud karon wala pa mahatag ang mid-year bonus sa mga empleyado.
Alayon niini, gimandoan ni Vice Gov. JigJag Pelaez ang sekretarya sa Sangguniang Panlalawigan nga mohimo og sulat og i-address sa mga miyembro sa finance committee.
Sa iyang bahin, gipasabot ni Board member Jerry Khu nga walay laing tumong ang ilang gihimong lakang tungod kay gusto lang silang masayod sa rason nganung dugay na-release ang mid-year bonus aron duna silay ikatubag oras nga mangutana ang mga empleyado.
Gibutyag usab ni Vice Gov. Pelaez nga importanteng masayran kanus-a mahatag ang mid-year bonus aron masiguro nga duna pay igong pondo alang sa mga programa sa probinsya.
Ang maong problema dili matud pa angay isangon kang Gov. Yevgeny Emano tungod kay duna usab kini daghang giatiman.
