General Santos City–Gikumpirma ni Sto. Niño, Municipal Councilor Helen Fale nga daan nang nagsulti kanila si Mayor Pablo Matinong nga aduna kini bahad sa iyang kinabuhi.
Kini ang nahimong kumpirmasyon sa Konsehala human gipusil patay si Sto. Niño Mayor Pablo Matinong mag alas 8:00 sa buntag kagahapong adlawa samtang kini nagbaktas sa may Barangay Libertad, sa maong lungsod padulong sa usa ka project site.
Apan sumala ni Councilor Fale, wala gidetalye ug maayo sa Mayor kung kinsa ang nagbahad sa iyang kinabuhi ug unsay motibo niini.
Gani ila nang gipahimangnuan ang Mayor nga mag-amping apan tubag kanila, wala man syay sala nganong siya patyon. Aminado ang konsehal nga sila nakugang sa gidangatan sa ilang Mayor sa lungsod.
Nasayran nga una nang naapil sa watch list ni Pangulong Rodrigo Duterte sa mga narco politician ang pangalan ni Mayor Matinong.
Apan sumala pa ni Kagawad Fale dugay nang nahinluan sa Mayor ang iyang pangalan sanglit nakig-kita gyud kini kay Pangulong Rodrigo Duterte aron klaruhon nga wala kini nahilambigit sa iligal nga droga.
Una na usab nga gipailawom sa surveillance ang Mayor kaniadto apan wala man silay nakit-ang ebidensya nga nalambigit gyud kini sa illegal drugs ug unsa mang iligal nga binuhatan.
