Natala sa lungsod sa Quezon, Bukidnon ang usa ka bag-ong positibo nga kaso sa COVID-19, nga unang kaso sa local transmission sa mao nga lungsod.
Sa interview sa RMN Malaybalay ngadto kang Lyle Egay, ang public information officer sa LGU-Quezon gibutyag niini nga ang pasyente usa ka 21 anyos nga babae, residente sa Laguingling area sulod sa Fortich Ranch, Blgy. 1A, Brgy. Poblacion, Quezon, Bukidnon.
Gihatod siya sa Bukidnon Provincial Hospital (BPH) sa Maramag kaniadtong Agosto 15, 2020 sa gabii aron manganak, apan nakasinati kini og ubo, hinungdan nga gipaagi kini sa rapid test for antibodies.
Nagpositibo siya sa rapid test, busa gihatod dayon kini sa BPMC Malaybalay, ug gipaagi sa RT-PCR test sunod adlaw. Kagahapon, nigawas ang resulta nga POSITIBO kini sa COVID-19.
Sa karon, wala na nakasinati og sintomas ang pasyente, gi-isolate ang pasyente karon sa Bukidnon Provincial Medical Center (BPMC) sa Malaybalay City.
Matud ni Egay nga isip pagpaniguro, ipailawom sa localized lockdown sa pipila ka adlaw ang lugar nga nagpalibot sa panimalay sa maong pasyente, hangtod nga masiguro nga wala nay lain tawong natakdan. Padayon usab ang contact tracing sa mga posibleng nakahimamat niya.
Gihangyo ang tanan lumulupyo sa tibuok lungsod sa Quezon, Bukidnon nga dili una molaag sa laing lugar kung walay importante o bug-at nga katuyoan hangtod sa maklaro ang sitwasyon.
Nasayran nga walay travel history ang mao nga pasyente.
Mahinumduman nga niadtong Agosto 18 natala ang tulo ka local cases sa COVID-19 sa probinsya diin 2 niini taga Manolo Fortich samtang ang 1 taga Maramag.
Sa pikas bahin, adunay 20 ka mga bag-ong recovered cases ang natala sa PHO kagahapong adlawa, August 19, 2020 hinungdan aron muabot na sa 91 ang kinatibuk-ang ihap sa naka-rekober sa COVID-19 sa Bukidnon.
Sa karon, 30 na lang ang aktibong kaso sa COVID-19 sa probinsya diin 3 niini ang anaa sa BPMC samtang 27 ang anaa sa NMWRC.
