BACOLOD CITY – Masobra 30 mil pesos nga alahas kag cash ang natigayon nga makuha sang mga suspek nga nagbudol-budol sa biktima nga isa ka senior citizen kahapon sang aga malapit sa isa ka commercial establishment sa Brgy. 12, diri sa ciudad sang Bacolod.
Ang biktima ginkilala kay Merlyn Belera, 61 anyos ang edad, pumuluyo sang Brgy. 3, Victorias City.
Suno sa biktima nga may mg alas 10:30 kahapon sang aga, ini siya ang nagatulu-tindog sa Terra Plaza, Brgy. 12, Bacolod City, may nagpalapit sa iya nga isa ka babayi nga indi niya kilala kag nagpamangkot kon diin siya pwede makabakal sang bato para sa iya balay.
Suno kay Nanay Merlyn nga ginsabat niya ang babayi nga wala siya nakahibalo apang may naglabay pa gid nga isa ka babayi nga suno sa iya “tomboy” kag nag-intra sa ila sugilanon tubtub nga may nag-abot nga isa ka salakyan kag may natabo nga transaction.
Ginpahayag sang biktima nga wala gid siya nakadumdum kon ngaa na convince ini nag mag-upod sakay sa salakyan, upod ang 2 ka suspek kag na-engganyo siya nga ihatag ang iya ATM kag PIN number, aritos nga nagabalor P15 mil pesos, cellphone nga nagabili P15 mil pesos kag cash nga isa ka libo ka pesos.
Kabaylo ini sang ginduhol sa iya sang suspek nga isa ka envelope nga may bundle sang bondpaper sa pagpati nga ini ang kwarta nga papel.
Bangud sini, nagpadulong na lamang sa Police Station 1 ang biktima agud nga magpa blotter./dyHB BACOLOD
