General Santos City—wala nay kinabuhi dihang Nakaplagan ang 70 anyos nga lola sulod mismo sa iyang lawak sa Sarangani Homes, Phase-2, Barangay San Isidro, Gensan.
Biktima giilang si Ma. Guillerma Lumictin, balo ug lumulupyo sa Block 17 lot 16, Sarangani Homes Phase-2, Barangay San Isidro, General Santos City.
Subay sa report Alas 10:00 sa gabie niadtong Nobyembre 19, 2017 mireport sa Police Station 4 silang si Carlito Dela Peña, Purok Chairman sa maong lugar ug Fernando Pare, 49 anyos, residenti sa lugar kalabutan sa gidangatan sa maong lola.
Nasayran nga tulo ka adlaw na nga wala kagawas sa iyang balay ang biktima ug nakita nalamang kini nga patay na sulod sa iyang lawak. Ayha pa ang panghitabo, alas 7:30 sa buntag niadtong Nobyembre 15, 2017, nagsulti ang biktima nga moadto kini sa Cebu aron mubisita sa iyang mga igsoon.
Nasayran nga naginosara ra ang biktima sa iyang panimalay ug aduna kini gihambin nga balatian sama sa diabetes ug hypertension.
Dihang nakit-an ang patayng lawas sa biktima nakababag pa kini sa pultahan gani naglisod pa ang mga residenti sa pag-abli sa balay sa nasangpit mao nga sila napugos nga gub-on ang bintana aron lang makuha ang patayng lawas sa masangpit.
Gituohan nga giatake sa iyang balatian ang biktima nga maoy hinungdan sa iyang kamatayon. Wala usay nakit-ang Foul play ang kapulisan ngadto sa lawas sa biktima dihang ilang gihimo ang imbistigasyon.
