Davao City – Patay nang nakit-an sa kabanay ang usa ka lola sulod sa iyang balay bandang alas-12:35 sa kaudtohon.
Giila sa kapulisan ang namatay nga si Maria Noli Dalhans, 61 anyos, ug nagpuyo sa Juliville Subdivision, Buhangin ning siyudad.
Ang biktima nakita na lamang nga wala nay kinabuhi sulod sa kwarto sa iyang pag-umangkon nga si Police Officer 3 Reil Rusil.
Matud sa maong pulis, nagbuy-od na ug wala nay kinabuhi ang iyang iyaan dihang iya kining naabtan sa kwarto.
Sa imbestigasyon, nasuta nga namatay ang biktima gumikan sa gihambin nga balatian niini nga diabetes ug diarrhea sulod na sa usa ka semana.
Apan nagdumili na si PO3 Rusil nga mupadayon pa ang kapulisan sa Buhangin sa ilang imbestigahan labot sa kamatayon sa biktima.
RadyoMan Joel Viray
